تحضير الزيتون فى البيت(باللهجة المغربية

أول حاجة ديري هي تعزليه . يعني الاحمر بوحدو و الاخضر بوحدو و الاسود بوحدو.

الاحمر شققيه بموس ماضي بحال الرازوار و اعزليه بوحدو في الماء و بدليه يوميا باش يحلى.

الاخضر فرقيه على 3 شي شققيه بحال الاحمر و اعزليه .

و شي فرشخيه بالحجرة و الشىء لاخور زوليلو العظم بديك المعاسة ديال الثوم.

و كل شكل بوحدو .آرى ما عندك من قراعي.

ملي يوجد الزيون يعني يصبح المذاق ديالو حلو .خودي الحامض كثير و نقيه و طحنيه في مولينيكس

مع الماء و الملح ثم صفيه و زيديه للزيتون .و نسمي كل حاجة باش بغيتي الثوم او ورقة موسى

او الزعيترة او الهريسة .

و المهم هو تغطي الوجه ديال كل قرعة بالزيت باش ما يضربوش الهواء و يغمال.

و حاجة اخرى ما تشرمليش بالثوم كمية كبيرة غير الفياس حتى يكمل و عاوديه.

و الحامض لابد ما طحنيه اما هكاك صحيح ما كينسموش مزيان.

كايجي باسل و دغيا كيخسر.

و ملي تكوني في الليل قدام التلفزة مافيها باس حطيه حداك و بداي تصاوبي و تفكريني و ادعي معايا

و ما تنسايش تلبسي الليكات يعني القفازات باش ما يخسروش ليك يديك.

أما الاسود ديريه في بيدو طبقة بطبقة مع الملحة الحية.و خليه مدة 40 يوم .

ومرة مرة نعسي داك البيدو و فينما دزتي من حداه حركيه يتكركب باش الملحة تدخلو مزيان كله.

من يعد حلي عليه و زولي منو المرج لي طلق و اغسليه و خليه يومان في الشمس و السمرة.

ثم ادهنيه بزيت الزيتون و اجمعيه في سطل .

و مرة مرة خدي كمية و شرمليها بالثوم و المعدنوس و الكامون و التحميرة و زيت الزيتون ياش تبدلي

وما يضربش للراس.ونفس الشيء لباقي اشكال الزيتون الاخضر والاحمر.

وها أنت مهنية من زيتون مدة سنة بكاملها .وحاجة اخرى اذا كان عندك كثير بزاف وما مسالياش ليه.

داك الزيتون الاخضر بالخصوص خليه صحيح و احتفظي به في بيدويات مع الماء حتى تصايبي شىء بشىء.

ما يوقع ليه والو.

</blockquote>